„Min Modersprak, wa klingst du schön! Wa büst du mi vertrut!“ – so fangt en Gedicht vun den nedderdüütschen Dichter Klaus Groth an. Un dat weer ok Tenor bi dat Plattdüütschfest vergangen Sünndag in de Ole Schüün op dat Gut Hanerau. Inlaadt harrn de Kreisvereen Rendsburg un de Oortsvereen Hanerau-Hademarschen vun den Sleswig-Holsteenschen Heimatbund (SHHB).
De Vörsittersche vun den SHHB-Oortsvereen Hanerau-Hademarschen, Waltraut Barnstedt, hett sik freit, dat so veele Lüüd kamen sünd, um en schönen Namiddag mit de plattdüütsche Spraak to verbringen, „denn Plattdüütsch hört wi gern“, see se.
Un ok de Rendsburger Kreisvereenvörsittersche Elke Heinz find, dat de plattdüütsche Spraak wat Besünners is: „Ik hööp, dat dat so blifft un wi dat ok an de Jüngeren un Kinner wiedergifft. Dat is nich eenfach, aver wi sünd so wiet, dat se dat to‘n Deel wedder in de School lehrt. Schöön is dat, wenn tohuus mit de Kinner ok wedder Platt snackt warrt. Dorüm mien Appell: Wenn se egen Kinner hebbt, maakt dat mööglich, dat ji mit de Kinner Plattdüütsch snackt, damit düsse schöne Spraak ok wiederdrogen warrt“, so Elke Heinz. Se hett verkloort, dat dat in‘n Kreis negen Oortsvereens gifft, de vör Oort för hör Liddmaten Veranstaltungen maken un Angebote in veel verscheeden Berieken hebbt. Dat Plattdüütschfest warrt elk Johr vun en anner Oortsvereen dörführt un utstaffert: düt Johr in Hanerau-Hademarschen.
„Min Modersprak“ vun Klaus Groth weer dann ok en vun de Leeder, de Helmut Robitzky un Ulf Schirmer speelt hebbt. Twüschen de Leeder geev dat plattdüütsche Geschichten vun Helmut Robitzky, to‘n Bispeel vun Storch Otte ut Oldenbüttel, de bi’n Gasthoff Gosch tohuus weer.
Jochen Pahl hett wat vun sien Hanerauer Watermöhl vertellt, gliek achter’n Diek, de de Möhlen mit Water andrievt. Al 1490 geev dat en Watermöhl, aver de weer noch achter de Hoff. An de aktuelle Standoort woor de Möhlen 1614 dat eerste Mal as „Hanrover Muhle furm Hofe“ in‘t Landregister nöömt. 1790 is de Möhl ümbuut worrn, vun „unterschlächtig“ in „oberschlächtig“. „Dat heet, dat Water löppt nu vun baven op dat Rad“, see Jochen Pahl.
De Möhl is siet 1909 in Besitt vun de Familie Pahl un woor bet 1965 kommerziell bruuk. „Achteran woor se vun mien Vadder Heinrich Pahl för den egen Berief bedreeven.“ 2012 hett sik de „Verein zur Erhaltung der Wassermühle Hanerau“ grünnt. De Liddmaten draapt sik regelmatig, um de Möhl instand to holen. 2020 woor dat Waterrad utwesselt, düt Johr de Standwelle. De Möhl is nu autark, „dat heet all Maschinen warrt mit Waterkraft andreven“, so Pahl. Besökers köönt sik dat ankieken, to‘n Bispeel bi de Möhlendag eenmal in‘t Johr. Jochen Pahl wiest, woans dat Koorn mahlt warrt un worüm de Möhl klappert. Man dat wichtigst is: „In de Möhl dröppt man sik un snackt platt.“
