De Texten sünd schreven, de Stimm is ölt, de Knööp vun de Schaltpult sünd sorteert, nu kann dat endlich losgahn: Dat Plattradio fiert an den 1. Septembermaand Premiere.
Maandags bet friedags sennt Plattradio von Klock 7 bet 8 op de Wellen vun den Apen Kanal Sleswig-Holsteen. „Uns Opdrag is dat journalistische Berichten över relevante Schehnisse in Welt und Region, fie un oprichtig“, vertellt de Redakschoonsbaas Jan Graf. An sien Siet stahn Redakteursch Dörte Riemer un Redakteur Arne Lentföhr. Jeden Morgen fangt se Klock 5 an un bereiten de Sennen vör. „De Narichtenminsch bereitet sik op den Narichten vör. De Moderatschonminsch de Moderatschon. Dorto gifft dat noch een aktuellen Bidrag un dat allens op Plattdüütsch. Musik warrt ok speelt.“ To de Kooperatschoonspartners hört ok de NDR. „Wi kriegt den aktuellen Narichtensatz vun Klock 5.30 un der warrt in godes Plattdüütsch ümsett, ok de O-Töne, de warrt aver dorto overvoiced“, verkloort Jan Graf.
En Besünnerheit an Plattradio is de niege Spraakbruuk. Dat journalistische Berichten över Schehnisse in Welt un Region bruukt annere Wöör as in ’n Alldag un in de Kultur. „Blangen de journalistischen Standards, de in frie’e Demokratien gellen doot, arbeit de Redakschoon na hoge Qualitätsstandards, wat de Spraak an sik angeiht. Dorto höört, dat de plattdüütsche Spraak utbuut warrt, woneem dat nödig is. Adressaten sünd Sprekers vun dat Nedderdüütsche un Lüüd, de de Spraak lehrt“, seggt Graf. De nödige Spraakutbu helpt dorbi, de Spraak för de Tokumst op Schick to bringen. „Spraakutbuu seht wi as en wichtige Opgaav blangen dat Journalistische“, so Graf. „Plattradio is en Steed, an de de nedderdüütsche Spraak mit Bedacht un Respekt op ansehn Rebeten as Politik oder Weertschop bruukt warrt. Platt bemött opstünns en dubbelten Swund: De Sprekers warrt weniger un de Spraak dünnt ut dörch dat Övernehmen vun Formen ut de düütsche Spraak. Plattradio verbetert den Status vun dat Plattdüütsche un levert bewusste Spraakvörbiller. Mit dat Warken gegen den dubbelten Swund deent plattradio de sleswig-holsteensche Billens- un Kulturpolitik, de sik as Maal sett hett, dat de Spraak an tokamen Generatschonen wiedergeven warrt“, heet dat in de Pressverkloren. Un: „Allens, wat een weten schull över Plattradio un sien Konzept, dat findt sik ünner plattradio.com. Dor gifft dat ok dagdäglich de aktuellen Narichten un Bidrääg to lesen un to’n Anhören un en Radio-Stream mit dat Beste, wat in de letzte Tiet produzeert worrn is. Bi Social Media, Podcast, Streaming-Plattforms – överall is Plattradio nu to griepen.“
